ჩაის მარგებლობას მრავალრიცხოვანი კვლევა ადასტურებს, თუმცა მისი თითოეული ტიპი სხვადასხვანაირად მოქმედებს ადამიანზე. მწვანე ჩაის შემადგენლობაში უხვად შემავალი გალატ ეპიგალოკატექინი (EGCG) ხელს უწყობს მრავალი დაავადების პროფილაქტიკას, მათ შორის - შარდის ბუშტის, ძუძუს, ფილტვის, კუჭის კიბოსი და ალცჰაიმერის დაავადებისას. გარდა ამისა, ის ამცირებს სტრესს და ასტიმულირებს ცხიმის წვას. ამიტომ არის, რომ მწვანე ჩაი საუკეთესო სასმელად მიიჩნევა წონის დაკლების მსურველთათვის.
შავი ჩაი მდიდარია კოფეინით. კვლევები მოწმობს, რომ ის ამცირებს ინსულტის განვითარების რისკს და ეფექტურად წმენდს მწეველთა ფილტვებს ტოქსინებისგან. ჩინური ულუნი ხელს უწყობს ორგანიზმიდან ტრიგლიცერიდების გამოდევნას, ამიტომ კარგი დამხმარე საშუალებაა წონის კლებისას. თეთრი ჩაი მინიმალურადაა დამუშავებული, ამიტომ მასში უხვადაა ანტიოქსიდანტები. ისინი აღკვეთენ თავისუფალი რადიკალების მიერ უჯრედების დაზიანებას. ამის გამო თეთრი ჩაის რეგულარული სმა კიბოს განვითარების რისკს ამცირებს. გარდა ამისა, იგი სისხლის წნევის ნორმალიზებასა და ქოლესტერინის დონის შემცირებასაც უწყობს ხელს. ჩაი პუერი ქოლესტერინთან დაკავშირებული პრობლემების დროს არის სასარგებლო, თანაც არაჩვეულებრივად მოქმედებს ფსიქიკურ ჯანმრთელობაზე. მცენარეული ჩაი გამხმარი ხილის, ყვავილებისა და ბალახების კომბინაციას წარმოადგენს და, შემადგენლობის კვალობაზე, აქვს სხვადასხვა თვისება - ძილის გაუმჯობესებიდან ჰიპერტენზიის მკურნალობამდე.
