მე ვთხოვ აზერბაიჯანის და საქართველოს სამართალდამცავ ორგანოებს _
გაარკვიონ, ვის ხვდებოდნენ
ნადირაშვილი და ჯაფარიძე ბაქოში?
გვესაუბრება საქართველოს აზერბაიჯანელთა ეროვნული კონგრესის თავმჯდომარე ალი ბაბაევი.
_ ბატონო ალი, რა სიტუაციაა აზერბაიჯანულ მოსახლეობაში. მუდმივად არსებობს იმის საშიშროება, რომ საქართველოში არსებული კომპაქტურად მცხოვრები ეთნიკური უმცირესობები ავტონომიებს მოითხოვენ.
_ მე, ალი ბაბაევი, მთელი პასუხისმგებლობით ვაცხადებ: აზერბაიჯანელებს შორის არ არის არც ერთი ადამიანი, რომელსაც შეიძლება ჰქონდეს სეპარატისტული განწყობები.
_ რელიგიური სახის დაპირისპირებაც კი არ შეიძლება მოხდეს?
_ რაც შეეხება რელიგიური მოტივის დაპირისპირებებს, ესეც გამორიცხულია. ამას წინათ იყო შემთხვევა სოფელ ალიბეგლოში, მაგრამ ეს იყო გაუგებრობა.
`ნაცმოძრაობის~ მმართველობის პერიოდში მოხდა მუსულმანთა გახლეჩა. ამ საქმის მოთავეები იყვნენ გიგა ბოკერია და დავით კირკიტაძე. ყველაფერი ქვემო ქართლში დაიწყო, როცა სახელმწიფო ჩინოვნიკებმა რელიგიური ცენტრები და არასამთავრობო ორგანიზაციები გახსნეს. ამ საქმეში ჩართული იყვნენ: პარლამენტის დეპუტატი, გუბერნატორის მოადგილე, სკოლის დირექტორები, გამგებლები, საკრებულოს თავმჯდომარეები. მათ შეკრიბეს თავიანთი ხალხი, აირჩიეს შეიხი, მუფთი, იმამი. ბოლოს გამოირკვა, რომ ყოველივე ამას ხელმძღვანელობდა ალაჰ შუქურ ფაშა-ზადე...
სამწუხაროდ, დღემდეა შემორჩენილი რელიგიური ჯგუფები, სადაც ერთიანი პოზიციები ვერ ფიქსირდება.
_ თქვენი აზრით, რა იყო ამ პრობლემის მიზეზი?
_ ეს იყო გარკვეული ინტერესი საქართველოს მუსულმანთა მიმართ. სუნიტებს მფარველობდა თურქეთი, შიიტებს _ ირანი, ვაჰაბიტებს _ საუდის არაბეთი, მაგრამ ადგილობრივმა მოსახლეობამ, ვინც არ იყო არც ერთ მხარეს, განმუხტეს ეს სიტუაცია.
2012 წლის არჩევნების პერიოდში, როცა რელიგიური კლანები ისე გააქტიურდნენ, რომ დესტაბილიზაცია განიზრახეს და გარკვეულწილად, მიაღწიეს კიდევაც ამას, შედეგად, არცთუ ცოტა რაოდენობის ხმები მოუგროვეს `ნაცმოძრაობას~. მახსოვს, მოლა ეუბნებოდა მრევლს: ხმა მიეცით 5 ნომერსო.
2012 წლის ოქტომბრის არჩევნების შემდეგ ყველა პრობლემა მოგვარებადი გახდა.
თუმცა არასახარბიელო პროცესები ახლაც მიმდინარეობს.
_ თქვენ ნაციონალურ ხელისუფლებასთან არ იყავით ცუდ ურთიერთობაში, რამდენადაც ვიცი...
_ როგორ გეკადრებათ. კარგად არ გცოდნიათ. მე ვიყავი რეპრესირებული ნაციონალების მიერ. 7 ნოემბრის მონაწილე ვარ, 26 მაისს მცემეს. ჩემს მიმართ არაერთხელ განხორციელდა არაკონსტიტუციური ქმედება.
_ თუკი ასეთი რეპრესირებული იყავით, როგორც ამბობთ, `ქართულ ოცნებაში~ ჩანერგილად რატომ გამოგაცხადეს ვიღაცებმა?
_ მე არასდროს ვყოფილვარ ჩანერგილი. ეს იყო ერთი, კერძო პირის დაინტერესება, რომელიღაც ძალების დაინტერესება, იმიტომ, რომ მე ვიყავი ლევან გაჩეჩილაძის პოლიტიკური მოძრაობის დაარსებიდან მის გვერდით, ერთადერთი აზერბაიჯანელი, რომელიც ქართული საქმისთვის იბრძოდა პოლიტიკური გზით.
7 ნოემბერს გამოვაცხადე შიმშილობა.
შემდეგ ბიძინა ივანიშვილის მიერ პოლიტიკაში შემოსვლის განცხადებიდან მეორე დღესვე მის გვერდით დავდექი. ვიყავი მისი სათათბიროს წევრი. 2012 წლის არჩევნების შემდეგ `ქართული ოცნების~ პოლიტსაბჭოს წევრი და დღესაც ვარ ბატონი ბიძინას და ირაკლი ღარიბაშვილის ერთგული. აი, ეს არ მოსწონს ზოგიერთს.
თუმცა დღეს `ქართული ოცნებისგან~ იგნორირებული და არაპოპულარული ვარ, კიდევ ვიმეორებ, ვარ იგნორირებული მე, ვინც `ქართული ოცნების~ ერთ-ერთი დამფუძნებელი ვარ და პოლიტსაბჭოს წევრიც გახლდით.
_ მიზეზი რა არის, ბატონო ალი, რითი ახსნით, რატომ ხართ, როგორც თქვით, იგნორირებული?
_ პირდაპირ ვიტყვი, ამ საქმეში მთავარი როლი რესპუბლიკურმა პარტიამ ითამაშა. პირველ რიგში, ჩემი შეხედულებები არ ექვემდებარება რესპუბლიკელების ლიბერალურ მიდგომას, მაგრამ არის კიდევ დაჯგუფება კოალიციაში, რომელსაც ჩემისთანა ერთგული, ბატონი ბიძინას თანამებრძოლები არ მოსწონთ.
_ რაში გამოიხატება თქვენი ერთგულება?
_ ერთგულება მე დავამტკიცე საპარლამენტო არჩევნების დროს, უდიდეს რისკებს არ შევუშინდი, მუქარებს, შანტაჟს გავუძელი.
_ რესპუბლიკელებს რომ ადანაშაულებთ, გასაგებია. მაგრამ კოალიციაში მყოფ თქვენს მოწინააღმდეგე დაჯგუფებაში ვის გულისხმობთ?
_ საპრეზიდენტო არჩევნების შემდეგ ბატონი ბიძინას ერთგული ადამიანები დარჩნენ უმუშევარი, გარიყული. ადგილობრივი თვითმმართველობის არჩევნების პერიოდში კი, სულ ახლახან მოხდა ისე, რომ ბიძინა ივანიშვილისა და ირაკლი ღარიბაშვილის ერთგულმა ადამიანებმა ბოიკოტი გამოუცხადეს არჩევნებს, ზოგი კი გადავიდა სხვა პარტიების მხარეს.
ასე მოხდა გარდაბანში, მარნეულში და სხვაგანაც.
სამწუხარო ამბავია, რომ ეს მავნებლობა გააკეთეს იმ ადამიანებმა, რომლებსაც არავითარი წვლილი არ აქვთ არც პარტიულ მშენებლობაში, არც ეროვნულ უმცირესობებთან ურთიერთობაში, აქვთ მხოლოდ ერთი რამ _ ამბიცია იმისა, რომ მიიღონ სავარძლები და `უხელმძღვანელონ~ ეროვნულ უმცირესობებს.
დამისახელოს ვინმემ `ქართული ოცნების~ საარჩევნო შტაბში ერთი აზერბაიჯანელი მაინც. ასეთი არ არსებობს. სამაგიეროდ, იყო თამაზ ავდალიანი, თბილისში მისი თანაშემწე ეროვნული უმცირესობების საკითხში იყო მისივე ეროვნების წარმომადგენელი.
ქვემო ქართლის კურატორი სლავა სტავრიდი. ბერძენი.
იმ დესტრუქციის შემტანი ძალების მიერ, ჩემი აზრით, სპეციალურად გაკეთდა ის, რომ აზერბაიჯანული მოსახლეობის ხმები გახლეჩილიყო ნაციონალების სასარგებლოდ.
ამას ვაცხადებ ღიად.
აზერბაიჯანელებს ასეთი ბუნება აქვთ: მენდე და გენდობი. `ქართულმა ოცნებამ~, როგორც თავის დროზე `ნაცმოძრაობამ~, ეს ნდობა დაკარგა, ახალი პარლამენტია ასარჩევი. თუმცა თბილისის აზრებაიჯანული მოსახლეობა მხარს უჭერს დავით ნარმანიას, თბილისის ახალ მერს.
ბატონმა ბიძინამ გააკეთა დაუჯერებელი რამ, ყაჩაღების დაჯგუფება უსისხლოდ მოაშორა ძალაუფლებას, მაგრამ ჯერჯერობით პარლამენტში სხედან ისეთი ადამიანები, რომლებიც ხელს აფარებენ `ნაცმოძრაობას~.
_ ვინ არიან, დაასახელეთ.
_ ეს არის რესპუბლიკური პარტია, რომელიც, ღიად გეუბნებით, მთლიანად არის ჩაძმაკაცებული `ნაცმოძრაობის~ წევრებთან.
ერთი რესპუბლიკელი რომ გამოდის და ამბობს: ჩვენთვის მისაღებია `ნაცმოძრაობა~, როგორც მეორე ოპოზიციური ძალაო, ეს საზოგადოებისთვის გამაღიზიანებელია.
პარლამენტში არიან ბატონი ბიძინას მომხრეები, მაგრამ უნდა იცოდეს ყველამ, რომ ისინი უმცირესობაში არიან.
როცა მარნეულში `ქართული ოცნების~ პარტია დავაფუძნეთ, კონფერენცია არ ჩაგვატარებინეს.
_ ვინ შეგეწინააღმდეგათ?
_ თვითონ `ქართული ოცნების~ წევრები თბილისიდან.
რაც ხდება, ყველაფერი `ქართულ ოცნებაში~ არსებული ერთი დესტაბილიზაციის შემტანი ჯგუფის კისერზეა.
_ ახლახან აზერბაიჯანში ორი საქართველოს მოქალაქე `ნაცმოძრაობის~ ლიდერი ირმა ნადირაშვილი და ზურაბ ჯაფარიძე დააკავეს.
რას ფიქრობთ ამასთან დაკავშირებით _ აზერბაიჯანში არსებობს საქართველოს ხელისუფლების ოპოზიციის საყრდენი ძალა?
_ მე აზერბაიჯანში ვიცხოვრე 14 წელიწადი, ვიყავი იქაური მოქალაქე, მაგრამ უარი ვთქვი მოქალაქეობაზე და 1997 წელს ჩამოვედი საქართველოში. დღეს ჩემი სამშობლოს _ საქართველოს მოქალაქე ვარ.
აზერბაიჯანში მიმდინარე მოვლენებს კარგად ვიცნობ. საბაჟოზეც ძალიან ბევრი ჩემი მეგობარი მუშაობს.
სამწუხაროდ, ის, რასაც `ნაციონალური მოძრაობა~ ბედავს და ჟურნალისტები, მაპატიეთ, მაგრამ თქვენი კოლეგებიდან ბევრს ჟურნალისტი ჰქვია, მაგრამ სინამდვილეში სპეცსამსახურის თანამშრომელია და მიტმასნებულია ჟურნალისტიკას, ასეთი ხალხი ცდილობს დანაშაულის ლაქა ჩამოსწმინდონ `ნაცმოძრაობას~. ეს არის სირცხვილი.
მეორე არხზე დღეს (22.06. 2014 _ ი. კ.) ბრიფინგებს ვუყურე, 7 ბრიფინგი ჩატარდა, თითქმის ყველა დეზინფორმაცია იყო.
მე, სამწუხაროდ, არ მეძლევა იმის საშუალება, რომელიმე ტელევიზიაში გამოვიდე და საკუთარი აზრი გამოვთქვა. ყველა ტელევიზიაში დაბლოკილი ვარ. მივწერე `იმედს~, `რუსთავი-2~-ს. საზოგადოებრივ მაუწყებელს, მაგრამ არ სურთ ჩემი მიწვევა. სამაგიეროდ, `ნაცმოძრაობა~ ყოველ დღე, ყოველ არხზე არის დასკუპებული და ლაპარაკობენ კვლავ ტყუილებს.
რაც შეეხება იმ ინციდენტს. სხვათა შორის, ბატონი ელჩი თეიმურაზ შარაშენიძე ნაციონალების დროსაც ელჩი იყო აზერბაიჯანში, მას დიდი ავტორიტეტი ჰქონდა და აქვს აზერბაიჯანში და თურქეთშიც, სადაც ის ასევე ელჩად იმყოფებოდა, ის ტყუილს არ იკადრებდა და არც სპონტანურ განცხადებას გააკეთებდა.
`ნაციონალებმა~, კერძოდ, ნადირაშვილმა და ჯაფარიძემ დაასახელონ, ვისი იყო ის თეთრი ჯიპი, რომლითაც ისინი დაჰყავდათ. ვისთან ჰქონდათ შეხვედრები აზერბაიჯანში, რა საკითხთან დაკავშირებით.
როცა 9 წლის განმავლობაში ბოკერიები, თარგამაძეები, კანდელაკები და სხვები აზერბაიჯანის ოპოზიციასთან იყვნენ ჩახუტებული და ილჰამ ალიევის წინააღმდეგ მუშაობდნენ, როცა მარნეულში, ბოლნისში, გარდაბანში ამ ადამიანების სახელით მათი წარგზავნილები ილჰამ ალიევის საწინააღმდეგო პოლიტიკას ქადაგებდნენ, ნაციონალები დუმდნენ. დღეს კი კვლავ ხმას იღებენ და კვლავ აზერბაიჯანის გასვრა უნდათ თავიანთი ვიწრო ინტერესებისთვის?!
მიხეილ სააკაშვილის ხელშეწყობით დამანგრეველ პოლიტიკას აწარმოებენ უკრაინაში, ახლა ასეთივეს ამზადებენ აზერბაიჯანში. ამისთვისაც დაწანწალებენ იქ. ნაციონალების მამები დღეს ჩახუტებული არიან ვითომ აზერბაიჯანის ხელისუფლებასთან, სინამდვილეში სხვაგვარადაა საქმე და მე ვთხოვ აზერბაიჯანის ხელისუფლებას, საქართველოს სამართალდამცავ ორგანოებს _ გაარკვიონ, ვის ხვდებოდნენ ნადირაშვილი და ჯაფარიძე აზერბაიჯანში. ზუსტი პასუხები მოითხოვონ ამაზე.
მე მაქვს ინფორმაციები, რომ `ნაცმოძრაობა~ გარდაბანში, მარნეულში, ბოლნისში აწყობდნენ ეროვნულ უმცირესობებში შუღლის ჩაგდებას და დესტაბილიზაციის გამოწვევას. სად იყვნენ 9 წელიწადი, ახლა რომ გააქტიურდნენ ეროვნულ უმცირესობებთან დაკავშირებით?
ახლა რომ შესტკივათ გული, მაშინ სად იყვნენ დაჩლუნგებული რომ ჰყავდა დავით კირკიტაძეს და მის ხალხს _ აზერბაიჯანულ მაფიას ქვემო ქართლის მოსახლეობა?!
მე მაქვს ინფორმაცია, რომ ნადირაშვილი და ჯაფარიძე ოთხი საათი იყვნენ დაკავებულნი აზერბაიჯანის საბაჟოზე და მოხდა რაღაც შეთანხმება, რის საფუძველზეც ისინი გაათავისუფლეს. რადგან მე ვიცი, შემთხვევები, აზერბაიჯანის საზღვარი 10000-ზე მეტი არადეკლარირებული ფულით რომ გადმოკვეთეს ნაციონალების დროს და ციხეში აღმოჩნდნენ.
როგორ მოხდა, რომ 1 მლნ. დოლარი და კიდევ რაღაც-რაღაცები მოჰქონდათ და თავისუფალი არიან?
ესენი დააკავეს, წაიყვანეს ბაქოში, ჩაი და ყავა დაალევინეს, მერე აეროპორტში მიიყვანეს, თავისი ხელით თვითმფრინავის ბილეთები აიღეს. ეს როგორ, ადამიანი თუ დადანაშაულებული არის უმიზეზოდ, მას სახელმწიფო მანქანამ ტყუილად შეუზღუდა გადაადგილების უფლება, ბილეთს სახელმწიფო აუღებდა და ისე გაამგზავრებდა.
თქვენ მკითხეთ, რატომ მაინცდამაინც აზერბაიჯანში? საქმე ისაა, რომ `ნაცმოძრაობას~ აზერბაიჯანში თავის დროზე ჰყავდა დასაყრდენი ძალები, რომლებიც იქედან ითხოვდნენ აზერბაიჯანულ ავტონომიას საქართველოში, ესენი დღესაც შეხმატკბილებული არიან და არაა გამორიცხული, არჩევნების მერე დაპირისპირება ჰქონოდათ დაგეგმილი. ნაციონალები დღეს აცხადებენ, რომ შემოდგომაზე არაა გამორიცხული, საპროტესტო მიტინგები დაიწყოს, რათა დაბრუნდნენ კვლავ და ძველებურად გააგრძელონ ძალადობა. სამწუხარო ამბავია, რომ მათ ზოგიერთი საერთაშორისო ორგანიზაციაც ემხრობა.
მაგრამ მოვლენებს ნუ გავუსწრებთ, ახლა მთავარია, მოხდეს `ქართული ოცნება _ დემოკრატიული საქართველოს~ პარტიის რეფორმა. დარჩნენ ერთგული ადამიანები, პარტიის დამფუძნებლები დღევანდელი პრემიერ-მინისტრის ხელმძღვანელობით იმ ადამიანებთან ერთად, რომლებმაც უდიდეს ზეწოლებს გაუძლეს, სოფელ-სოფელ დადიოდნენ და ნაციონალი ტერორისტების წინააღმდეგ მუშაობდნენ.
ირანდა კალანდაძე
