"X ფაქტორის" გუშინდელი ლაივკონცერტი სალომე ტეტიაშვილმა დატოვა. მასთან ერთად აუტსაიდერებში მებო ნუცუბიძე იდგა. მენტორებიდან სამმა წევრმა ხმა მებოს მისცა, სტეფანემ კი თავისი გუნდის წევრს. სალომეს მენტორებმა სიმღერა დაუწუნეს და უთხრეს, რომ სტეფანემ ცუდად შეურჩია სიმღერა და მასში კონკურსანტი თავს თავდაჯერებულად არ გრძნობდა. სალომეს დედამ, ქალბატონმა თამარმა აღელვების ფონზე კომენტარის გაკეთება არ ისურვა. PrimeTimeNews-თან სალომე პირველ კომენტარს აკეთებს.
სალომე ტეტიაშვილი: რომ გითხრათ, გული არ დამწყდა-მეთქი, მოგატყუებთ. კმაყოფილი ვარ ჩემი საერთო შედეგით. სრულიად გამოუცდელი ადამიანისთვის კიდევ ბევრს მივაღწიე. არასდროს არ მიმუშავია პედაგოგებთან, ასეთ პროექტში არასდროს მიმიღია მონაწილეობა. ყველაფერი ჩემით და ჩემი მენტორის დახმარებით გავაკეთე. ვერც ვიფიქრებდი, რომ აქამდე მოვიდოდი. ბევრად დახვეწილი და მაგარი მომღერლები არიან პროექტში. უბრალოდ, მინდოდა დიდი ხანი მემღერა ხალხისთვის. მაგრამ ყველაფერი არ მთავრდება. ახლა ვიწყებ ცხოვრებას.
- მენტორებზე ნაწყენი ხომ არ ხარ?
- სავსებით სამართლიანები იყვნენ მენტორები. სავსებით სამართლიანად დავტოვე პროექტი. მე უნდა წავსულიყავი სახლში და არა მებო.
- სიმღერა დაგიწუნეს. მართლა არ იყავი თავდაჯერებული?
- ჩემი მაქსიმუმი ვერ გამოვავლინე. ყველაფერმა ერთად იმოქმედა, ის, რომ პირველი ვიყავი, ის, რომ ვნერვიულობდი...
- ივლი საგულშემატკივროდ?
- ვივლი, ჩემი ფავორიტიც მყავს, მაგრამ ვერ დავასახელებ.
- ეს არ არის თანაგუნდელი სოფი სააკაშვილი?
- სოფი ყველაზე მაგარია. სტეფანეს ვეთანხმები თავის კომენტარში. პროექტშიც ვინც ვართ, სოფისნაირად არავინ მღერის.
http://primetimenews.ge/
http://primetimenews.ge/
