"პაციენტი შემოიყვანეს გუშინ. ის სასწრაფომ მოიყვანა. მდგომარეობა სტაბილურია. იმყოფება რეანიმაციულ განყოფილებაში და უტარდება მკურნალობა. აღენიშნება ქალა-ტვინის დახურული ტრავმა. მექანიზმებთან დაკავშირებით ინფორმაცია არ გაგვაჩნია. არ ვართ კომპეტენტურები", - აღნიშნა ექიმმა.
კითხვაზე, გამორიცხავს, თუ არა, რომ დაზიანება მიღებული იყო ცემისგან, ექიმმა განაცხადა, რომ არც გამორიცხავს და არც ადასტურებს, რადგან ეს არ არის მისი კომპეტენცია.
ცემის ფაქტი რომ ყოფილიყო საქმე იქნებოდა აღძრული, ვინაიდან საქმე არ არის აღძრული, სავარაუდოდ, ამასთან არ გვაქვს საქმე, - ეს განცხადება სოფლის მეურნეობის მინისტრმა, ოთარ დანელიამ რესპუბლიკურ საავადმყოფოში მისი მოადგილის დავით გალეგაშვილის მონახულების შემდეგ გააკეთა.
გალეგაშვილი ქალა-ტვინის დახურული ტრავმით კომატოზურ მდგომარეობაში იმყოფება.
მინისტრის ინფორმაციით, დავით გალეგაშვილი საავადმყოფოში გუშინ მიიყვანეს. "მისი ჯანმრთელობის მდგომარეობა სტაბილურია, თუმცა, მინდა ვთხოვო ყველა მედიასაშუალებას, ნუ შეიყვანენ საზოგადოებას შეცდომაში და გადაუმოწმებელ ინფორმაციას ნუ გაავრცელებენ. საზოგადოებამ მიიღო
არასწორი ინფორმაცია, ეს შემთხვევა არ მომხდარა დღეს, მოხდა წუხელ, - განაცხადა დანელიამ.
სოფლის მეურნეობის მინისტრის მოადგილე დავით გალეგაშვილი თავის ტრავმით რესპუბლიკურ საავადმყოფოში იმყოფება.
როგორც "ინტერპრესნიუსს" სამინისტროს პრესსამსახურში განუცხადეს, შემთხვევა გუშინ მოხდა, დავით გალეგაშვილი, წაიქცა, რის შედეგადაც თავი დაარტყა და ამჟამად კომაშია. "ის მთელი დღის განმავლობაში ექიმების დაკვირვების ქვეშ იმყოფება. ექიმების ინფორმაციით, მისი მდგომარეობა უმჯობესდება", - აღნიშნეს პრესსამსახურში.
თუმცა, ვრცელდება ინფორმაცია, რომ დავით გალეგაშვილი ნაცემია, რასაც პრესსამსახურში კატეგორიულად უარყოფენ.
