ამჟამად ვეუფლები მსახიობის პროფესიას, მესამე კურსზე ვარ, ძალიან მომწონს ეს სფერო. თუმცა, მოგეხსენებათ, მოდელიც ვარ, მიყვარს ეს საქმე და არ მინდა, ჰობი დავარქვა, არ მომწონს, როცა ასე მოიხსენიებენ, ეს უფრო ჩემი დროებითი საქმიანობაა.
საოცნებო როლი, თუნდაც უკვე გადაღებულ ფილმებში:
სიმართლე გითხრა, საოცნებო როლი არ მაქვს, მინდა, სხვადასხვა ჟანრის, ხასიათის, თვისებების პერსონაჟები განვასახიერო. ცოტა ხნის წინ ვუყურე ''ანა კარენინას'' კირა ნაიტლის შესრულებით, ჰოდა, ალბათ, ამ როლს შევასრულებდი.
საყვარელი ფილმი, პერსონაჟი და მსახიობი:
ჩემდა სამარცხვინოდ, საყვარელი ფილმი არის ''ჰარი პოტერის'' ყველა ნაწილი. ამას იმიტომ ვამბობ, რომ ამას წინათ გამოკითხვა იყო საყვარელი ფილმების შესახებ, მე გულწრფელად ''ჰარი პოტერი'' დავასახელე, დანარჩენმა რესპონდენტებმა კი კლასიკად ქცეული ფილმები ჩამოთვალეს, სიუჟეტის გასვლის შემდეგ ყველა მე დამცინოდა. რაც შეეხება საყვარელ მსახიობს, კირა ნაიტლია, პერსონაჟი კი მთავარი გმირი ფილმიდან _ ''გოგონა დრაკონის ტატუთი''.
დიზაინერი, რომლის ჩვენებაშიც მონაწილეობას არ მიიღებდი:
ეგეთი არ არსებობს. თუ მთხოვენ, ყველას ჩვენებაზე გამოვალ, მიუხედავად იმისა, მომწონს თუ არა მისი შემოქმედება. როცა მთხოვენ, უარს ვერ ვეუბნები.
ვახშამი მსოფლიო ვარსკვლავთან...
U2-ს სოლისტ ბონოსთან ვივახშმებდი, მამაჩემი ბავშვობიდან გიჟდება მასზე, ჰოდა, მამასაც წავიყვანდი და ამ ორ ადამიანს ერთმანეთს გავაცნობდი. შეხვედრის ადგილს მნიშვნელობა არ ექნებოდა, ადგილი ამ შემთხვევაში არაფერს ნიშნავს.
წიგნი, რომელიც ბოლოს წაიკითხე:
კნუტ ჰამსუნის ''მისტერიები''. რატომღაც წიგნების კითხვა ვიცი ორ-ორჯერ. ''მისტერიები'' აქამდეც წაკითხული მქონდა, მაგრამ ახლა კიდევ ერთხელ გადავავლე თვალი. ფილმების შემთხვევაშიც ასე ვარ, ორჯერ ვუყურებ ხოლმე.
რა არის სიყვარული?
სიყვარულს არ აქვს არც სახელი, არც დახასიათება, ის ყველა ადამიანისთვის სხვადასხვა რამ არის, ჩემთვის კი სიყვარული ბედნიერებაა. არსებობენ ადამიანები, ვისაც არ შეუძლია სიყვარული და ეს ძალიან ცუდია.
რამდენჯერ ყოფილხარ შეყვარებული?
რთული სათქმელია, როდესაც გიყვარს, ის გრძნობა მთავრდება და შემდეგ ახალ ურთიერთობას იწყებ, გგონია, რომ ესაა ნამდვილი და ძლიერი გრძნობა. მიუხედავად ამისა, შემიძლია ვთქვა, რომ ცხოვრებაში სამჯერ მყვარებია.
უკაცრიელ ადგილას ვისთან ერთად გაემგზავრებოდი?
არ მინდა გამგზავრება, მაგრამ თუ ეს უცვლელი პირობაა, მაშინ ჩემს შეყვარებულ ჯეჯისთან ერთად.
რისი გეშინია:
მარტოობისა და სიბნელის. ამ ბოლო დროს წავიკითხე სტატია, რომელშიც ეწერა, რუსთავში ვიღაც ბავშვი ჭინკას ხედავსო, ჰოდა, მეც შემეშინდა ჭინკის, კი მეუბნებიან _ არ არსებობსო, მაგრამ მაინც მეშინია.
რა გაკომპლექსებს?
სიტყვა კომპლექსი არ მიყვარს, მაგრამ ვიძაბები მაშინ, როცა მაკვირდებიან.
რას გამოჰყავხარ წყობიდან?
ერთი და იმავე რაღაცის ბევრჯერ გამეორებას.
მტირალა ხარ?
არა, არ ვარ, მაგრამ ამ ბოლო დროს ვიტირე რაღაცებზე, ჰაიმორიტი მაქვს, თავი მტკიოდა და მაგაზე ვიტირე. ალბათ, ემოციურობა გადაღლილობის ბრალია, ეს წელი ძალიან დატვირთული იყო.
კითხვა მარიტასგან მიხეილ სააკაშვილს:
(ფიქრობს) ამას წინათ მისი ''ფეისბუქის'' ოფიციალურ გვერდზე ვნახე სასაცილო ფოტო, სადაც აღბეჭდილია მიხეილ სააკშვილი პუტინის პლაკატთან ერთად, რომელსაც ცუდი წარწერა აქვს. პლაკა-ტი კი მანქანის უკანა მხარესაა გაკრული. ჰოდა, მაინტერესებს, სად ნახა ეს მანქანა და რა განწყობა ჰქონდა, რას ფიქრობდა ფოტოს გადაღებისას.
ციცი ომანიძე
ჟურნალი ''რეიტინგი''
